Բրիտանական իշխանությունները դադարեցնել չինական հեռահաղորդակցական Huawei ընկերության մասնակցությունը 5G ազգային հեռախոսային ցանցի ստեղծմանը, հայտնում են բրիտանական ԶԼՄ-ները՝ նշելով, որ իրադարձությունների նման զարգացումն էլ ավելի կվատացնի Լոնդոնի հարաբերությունները Պեկինի հետ, բայց կարժանանա Վաշինգտոնի գոհունակությանը:
Քաղաքականության կանխատեսվող փոփոխությանը նախորդել էր գաղտնալսման ռիսկերի վերանայումը բրիտանական կիբերանվտանգության ազգային կենտրոնի (ԲԿԱԿ) կողմից, հայտնում է Sunday Telegraph- ը:
Բրիտանացի պաշտոնյաները «Ամերիկայի ձայն»-ի հետ զրույցում հաստատել են թերթի հրապարակման իսկությունը։
Ավելի վաղ ԲԿԱԿ-ն կարծում էր, որ Huawei-ի հետ կապված ռիսկերը հնարավոր է կառավարել եւ մեղմել, ինչի հետ ամերիկյան հատուկ ծառայությունները համաձայն չէին: Հունիսին Huawei-ի վրա ԱՄՆ նոր սահմանափակումների ներդրումը փոխեց պատկերը, նախազգուշացրել է ԲԿԱԿ-ը։
Բրիտանական հետախուզության ղեկավարությունը եզրակացրել էր, որ պատժամիջոցները, որոնք թույլ չեն տալիս Huawei-ին օգտագործել ԱՄՆ մտավոր սեփականության վրա հիմնված բաղադրիչները եւ կիսահաղորդիչները, նշանակում են, որ չինական ընկերությունը ստիպված կլինի տարրեր օգտագործել, որոնք «վստահություն չեն ներշնչում», ինչը մեծացնում է անվտանգության ռիսկերը:
Մեծ Բրիտանիայի իշխանությունները կազմում են 5G ցանցերում արդեն տեղադրված Huawei սարքավորումների հեռացման ժամանակացույցը։ Բրիտանական BT եւ Vodafone հեռահաղորդակցական ընկերությունները խնդրել են կառավարությանը մինչեւ 2030 թվականն իրենց ժամանակ տալ՝ այս աշխատանքն իրականացնելու համար, սակայն, ըստ պաշտոնյաների, Դաունինգ Սթրիթում ցանկանում են, որպեսզի դա ավելի արագ տեղի ունենա, նույնիսկ եթե գործընթացը դանդաղեցնի նոր ցանցի շահագործումը:
Քաղաքականության փոփոխությունը տեղի է ունեցել Լոնդոնի եւ Պեկինի միջեւ աճող դիվանագիտական վեճի ֆոնին՝ Չինաստանի կողմից Հոնկոնգի համար անվտանգության նոր օրենքի ընդունման կապակցությամբ:
0Comments