«Ոչ մարտական կորուստների թիվը նվազեցնելու համար առաջին կարևոր քայլը արդեն վարչապետն արել է, ովքեր եղել են պատասխանատու, արդեն ազատվել են աշխատանքից», -ArmDaily.am-ի հետ զրույցում ասաց ՀՀ և ԼՂՀ Առաջին աստիճանի մարտական խաչերի ասպետ, հատուկ նշանակության զորքերի հրամանատար, գնդապետ Արթուր Ալեքսանյանը:
Գնդապետն առաջարկում է ստեղծել դիսբատ (дисциплинарный батальон), որպեսզի բոլոր կարգազանցներն այդտետ ծառայեն և մյուսներին դաս լինի, որ բանակում քրեական ենթամշակույթ կրելն անթույլատրելի է:
«Կարևոր է, որ բանակում նոր մշակույթ, նոր սիստեմ ստեղծվի: Մինչև բանակ գնալը բոլորը պետք է ոչ միայն բժշկական հետազոտություններ անցնեն այլ նաև փսիխո, որպեսզի կատեգորիաների բաժանվեն: Պետք է հասկանալ ով ինչի է ունակ,ով որտեղ կարող է ծառայել: Միայն բժշկական հետազոտություն անցկացնելով տանում ենք բանակ, դա մի քիչ սխալ եմ համարում: Նաև առաջարկում եմ ստեղծել նոր կառույց, որտեղ ռազմահայրենասիրական կազմակերպությունների միջոցով երիտասարդների համար նախքան բանակ գնալը դասընթացներ կազմակերպվեն և բանակի ժամանակ հետևողական լինեն այդ զինվորների վարքին:
Հաջորդ քայլը կարծում եմ այն պետք է լինի, որ նոր մշակույթ ստեղծվի որ բոլոր զինծառայողները արտոնություններ ունենան՝ թե բանկային համակարգում, թե տուն գնելիս, թե սովորելիս: Պետք է այնպես անել, որ նրանք իմանան հանուն ինչի են զոհաբերության գնում: Պետք է բանակ գնալը պատիվ համարվի,ցանկություն լինի գնալ, հիմա մարդիկ վախենում են, ամեն ինչ անում են՝ որ չգնան, այս ամենից վախ է առաջանում նրանց մեջ:
Զենքով երբեք ոչինչ չի լինում, հոգով է պետք պատրաստ լինել ու կռվել որպեսզի հաղթանակի հասնենք»,-ասում է Ալեքսանյանը:
Նա նշում է՝ ամեն ինչ սկսվում է ընտանիքից, բոլոր այն ընտանիքները, ովքեր ծառայության զինվոր են ուղարկում, պետք է գոնե այդ ժամանակահատվածում արտոնություններ ունենան:
«Տղադ գնաց, չգնաց բանակ դու մյուսներին հավասար ես, այդպես չպետք է լինի: Որդուն բանակ ուղարկած ծնողները պետք է հպարտությամբ ապրեն, որոշակի հարկային արտոնություններ ունենան»,-ասում է գնդապետը:
Արթուր Ալեքսանյանն ընդգծում է.
«Ամոթ է պարզապես, խաղաղության ժամանակ ինչպես կարող է ինքնասպանություն, այսքան մահ լինել: Կյանքումս ամենամեծ մարտը, որ վարել եմ անգամ այդքան զոհ չեմ տվել»:
Սակայն նաև հավելում է՝ այսօր ղեկավարությունը, ՊՆ նախարարը գիշեր ու ցերեկ մտածում են, փորձում են ամեն ինչ անել, որ հարթեն խնդիրները:
0Comments