Ազգային անվտանգության հարցերով խորհրդական Ջոն Բոլթոնի և ԱՄՆ նախագահ Դոնալդ Թրամփի հարաբերությունները, ըստ Daily Mail պարբերականի՝ վատթարացել են թալիբներին ընդունելու նախագահի հայտարարությունների ֆոնին:
Երեքշաբթի Ազգային անվտանգության հարցերով արդեն նախկին խորհրդականին նկատել են Սպիտակ տան Արևմտյան թևում: Աղբյուրի հաղորդմամբ՝ Թրամփը, թեև այդ պահին նախագահական նստավայրում է գտնվել, սակայն չի հանդիպել Բոլթոնի հետ:
Թրամփի՝ Բոլթոնի հեռանալու մասին հայտարարությունից հետո Վաշինգտոնում գտնվող Բոլթոնի տնից դաշնային գործակալները դուրս են բերել վերջինիս պետական սեփականությունը, ներառյալ՝ համակարգչային սարքավորումները:
Նրա հանկարծակի հրաժարականի հիմքում, ինչպես հաղորդում է աղբյուրը, ընկած է 9/11-ի ահաբեկչության 18-րդ տարելիցից մի քանի օր առաջ խաղաղ բանակցությունների նպատակով Քեմփ Դեվիդում թալիբների ներկայացուցիչներին ընդունելու Թրամփի նախաձեռնությունը, քանի որ Բոլթոնը համաձայն չի եղել թալիբների ներկայացուցիչների հետ տետատետ հանդիպմանը:
Թեև ավելի ուշ Թրամփը հայտարարել էր, որ չեղարկում է թալիբների առաջնորդների և Աֆղանստանի նախագահ Աշրաֆ Ղանիի հետ սեպտեմբերի 8-ին նախատեսված հանդիպումները, ինչպես նաև հրաժարվել էր մասնակցել խաղաղ կարգավորման բանակցություններին Քաբուլում տեղի ունեցած ահաբեկչությունից հետո, որի արդյունքում զոհվել է 12 մարդ:
Աղբյուրը գրում է, որ Թրամփն ու Բոլթոնը նաև անհամաձայնություններ են ունեցել Իրանին, Հյուսիսային Կորեային, Ռուսաստանին և Վենեսուելային վերաբերող կարևոր հարցերում: Բոլթոնը անցյալ ամիս G7-ի գագաթնաժողովի ժամանակ հրաժարվել է հեռուստատեսություն եթերում պաշտպանել Աֆղանստանում և Ռուսաստանում Թրամփի վարած քաղաքականությունը:
Ինչպես հայտնի է, Չարլզ Քուփերմանը՝ Բոլթոնի տեղակալը, երեքշաբթի դարձել էր Ազգային անվտանգության հարցերով խորհրդականի պաշտոնակատար, որը ավելի քան երեսուն տարի եղել է Բոլթոնի խորհրդականը, սակայն ենթադրվում է, որ նա այդ պաշտոնում երկար չի մնա, քանզի Թրամփը նրան արագ կհեռացնի «ազգային անվտանգության խորհրդի տան մաքրման շրջանակներում»:
Ըստ աղբյուրի՝ Ազգային անվտանգության հարցերով խորհրդականի պաշտոնի հավակնորդ է համարվում Ռոբերտ Բլերը, որը Սպիտակ տան աշխատակազմի ղեկավարի պաշտոնակատար Միք Մալվեյնիի ավագ խորհրդականն է:
Bloomberg-ի տվյալներով՝ մյուս հնարավոր հավակնորդները, որոնց մասին Սպիտակ տանը խոսակցություններ են պտտվում, Ռոբերտ Օ'Բրայենն ու նախագահի պատանդների հարցերով դեսպանորդ և Պոմպեոյի ավագ խորհրդական Բրայան Հուքն է:
Ավելի վաղ ԱՄՆ նախագահ Դոնալդ Թրամփը հայտարարել էր, որ աշխատանքից հեռացրել է ազգային անվտանգության հարցերով խորհրդական Ջոն Բոլթոնին:
«Անցյալ գիշեր տեղեկացրել եմ Բոլթոնին, որ իր ծառայությունների կարիքը Սպիտակ տունն այլևս չունի: Ես կտրականապես համաձայն չեմ նրա առաջարկներից շատերի հետ, ինչպես և վարչակազմի այլ աշխատակիցներ նույնպես: Այդպիսով, խնդրել եմ Ջոնին հրաժարական տալ, ինչը նա արել է այսօր առավոտյան: Ազգային անվտանգության հարցերով նոր խորհրդականին կնշանակեմ հաջորդ շաբաթ»,- գրել էր Սպիտակ տան ղեկավարը: Գրում է՝ tert.am-ը:
0Comments