Նիկոլ Փաշինյանի իշխանության հետեւից երեւում է հայ ժողովրդի կամքը, եւ որեւէ ավել բան չի կարող երեւալ երբեւիցե: Այս մասին այսօր՝ մայիսի 24-ին, լրագրողների հետ զրույցում ասաց ՀՀ Ազգային ժողովի նախագահի տեղակալ Ալեն Սիմոնյանը՝ անդրադառնալով հայտարարություններին, թե ՀՀ վարչապետ Նիկոլ Փաշինյանի իշխանության հետեւում կանգնած է Հայաստանի առաջին նախագահ Լեւոն Տեր-Պետրոսյանը:
Սիմոնյանն ասաց, որ այդ հայտարարություններին չի ցանկանում նույն ոճի մեջ արձագանքել, եւ եթե նախկին թիմի անդամներից մեկ կամ երկու հոգի համագործակցում է, դա չի նշանակում որ իրենք համակարծիք են:
«Հանրապետական կուսակցության անդամներից մի քանիսի հետ էլ ենք համագործակցում, ինչու չեք ասում, որ միակարծիք ենք նաեւ իրենց հետ: Նիկոլ Փաշինյանի եւ Լեւոն Տեր-Պետրոսյանի միջեւ սկզբունքային տարբերություններ կան: Եթե հիմա ես որեւէ մեկի հետ շփվեմ կամ համագործակցեմ, ապա դա նշանակում է, որ քաղաքական առումով այդ 2 թիմերը նո՞ւյնն են: Ու այդ հայտարարություններին ես ժպիտով եմ վերաբերվում»,- ասաց Ալեն Սիմոնյանը:
Անդրադառնալով երեկ՝ Ազատության հրապարակում ՀՅԴ-ի հրավիրած հանրահավաքին Ալեն Սիմոնյանն ասաց, որ ողջունում է հանրահավաքը.
«Կարծում եմ, որ ՀՅԴ-ն պետք է էլ ավելի ակտիվ լինի քաղաքական դաշտում, քանի որ իր անհրաժեշտությունը կա ու միշտ եղել է»,- ասաց Սիմոնյանը:
Նշենք, որ Լեւոն Տեր-Պետրոսյանի գլխավորած ՀԱԿ կուսակցության անդամներից են եղել ՀՀ վարչապետի մամուլի խոսնակ Վլադիմիր Կարապետյանը, «Իմ քայլը» խմբակցության ղեկավար Լիլիթ Մակունցը:
0Comments