ԱԳ նախարար Արարատ Միրզոյանն այսօր կայացած մամուլի ասուլիսում նշեց՝ Ալիևի հարցազրույցում հնչել են ՀՀ ինքնիշխան տարածքի նկատմամբ անթաքույց տարածքային պահանջներ: «Մենք տեսանք, թե ինչպես են Հայաստանի այս կամ այն քաղաքները կամ մարզերն անվանվում ձևախեղված ձևով, մեծ հաշվով, ամբողջ Հայաստանի Հանրապետությունն անվանվում է Արևելյան Ադրբեջան»:
Նախարարի խոսքով՝ միջազգային ներգրավվածությունը իրենք կարևորում են այն պատճառով, որ խաղաղությունը, որը, ենթադրաբար, կկառուցվի, կհաստատվի Հարավային Կովկասում, բխում է ոչ միայն Հայաստանի և Ադրբեջանի շահերից, այլ նաև տարածաշրջանային դերակատարների շահերից:
«Երևույթները, որոնց մենք բախվում ենք կամ որոնց հետ գործ ենք ունենում, ուղղակիորեն առնչվում են այնպիսի արժեքների, որոնք համամարդկային են, այսինքն` երբ որ խոսում ենք էթնիկ զտումներից, երբ որ խոսում ենք մարդկանց իրավունքներից, այս բոլորը վերաբերում են ոչ միայն երկու երկրներին, այլ նաև ողջ մարդկությանը»,- նշել է Միրզոյանը։
0Comments