Հայաստանի և Ադրբեջանի միջև ռազմական գործողություններ սկսելու հավանականությունը մնում է մեծ․ Ռազմական փորձագետ

Մանրամասներ
Live24.am-ը ներկայացնում է

Հայաստանի և Ադրբեջանի միջև ռազմական գործողություններ սկսելու հավանականությունը մնում է մեծ, միշտ պետք է պատրաստ լինել։ Ամեն ինչ շատ արագ է փոխվում, շատ բան կախված է Ուկրաինայի իրադարձություններից, Երևանի և Բաքվի միջև բանակցային գործընթացից և այլ գործոններից։ Այս մասին NEWS.am -ի թղթակցի հետ զրույցում ասաց APRI Armenia-ի հետազոտող, ռազմական փորձագետ Լեոնիդ Ներսիսյանը։

Նրա խոսքով՝ Ադրբեջանի համար ամենալուրջ սահմանափակող գործոնները մնում են Իրանը, մասամբ Ռուսաստանը և Արևմուտքը։

«2020 թվականի իրադարձությունները ցույց տվեցին, որ Հայաստանի անվտանգության երաշխավորը կարող է լինել միայն հայկական բանակը և ոչ որևէ այլ երկիր։ Հույս պետք է  դնել միայն ինքդ քեզ վրա: Նույն հայ-ռուսական հակաօդային պաշտպանության միասնական համակարգը գործնականում իրեն այդպես էլ չդրսևորեց, թեև դա կարող էր տեղի ունենալ, ասենք, 2022 թվականի սեպտեմբերին»,- հավելեց Ներսիսյանը։

Նրա կարծիքով՝ ռուսական 102-րդ ռազմաբազայի հակաօդային պաշտպանության համակարգը հնացել է, եւ այնտեղ քիչ զինատեսակներ կան։ «Չի կարելի ասել, որ դա սկզբունքորեն տարբերվում է այն զինատեսակներից, որն ուներ Հայաստանը 2020 թվականի կանոնակարգով»,- նշեց նա։

«Ինչ վերաբերում է ՀԱՊԿ-ի շրջանակներում միասնական ՀՕՊ համակարգին, որի մասին խոսել է ՌԴ պաշտպանության նախարար Շոյգուն, ապա դա նշանակում է, որ երկրները կարող են կամավոր կերպով ներառել իրենց զենքի մի մասը այս միասնական համակարգում և նույն կերպ, իրենց հայեցողությամբ, վերադարձնել այն իրենց հաշվեկշիռ։ Ուստի ՀԱՊԿ շրջանակներում ՀՕՊ միասնական համակարգի ստեղծումը ոչ լուրջ դրական ազդեցություն կունենա, ոչ էլ լուրջ բացասական ազդեցություն»,- եզրափակեց փորձագետը։