Երկար ժամանակ համարվում էր, որ քնելուց առաջ ուտել չի կարելի, քանի որ քնի ընթացքում օրգանիզմում բոլոր գործընթացները դանդաղում են եւ ստամոքսը չի կարող նորմալ մարսել սնունդը: Live24.am-ի հետ զրույցում ասել է գաստրոէնտերոլոգ-դիետոլոգ Նինա Մուրադյանը և բացատրել, որ իրականում սնունդը նորմալ է մարսվում, սակայն հագեցվածության զգացողությունն ավելի ուշ է առաջանում, քան օրվա ցերեկային ժամերին, ինչն էլ հանգեցնում է չափից շատ ուտելուն եւ ավելորդ քաշ հավաքելուն:
Ըստ դիետոլոգի՝ հաճախ գիշերն ուտելու պատճառ է դառնում հոգեկան վիճակը: Շատերը ցերեկն աշխատում կամ սովորում են, իսկ երեկոյան՝ հանգստանում եւ թուլանում: Այդ պատճառով մութն ընկնելուն պես դժվար է դառնում վերահսկել ախորժակը:
«Չափից շատ ուտելու պատճառ կարող են դառնա նաեւ սթրեսն ու դեպրեսիան, հոգեկան տարատեսակ խանգարումները, որոնց դեպքում մարդիկ հաճախ ցերեկն ախորժակ չեն ունենում, փոխարենը գիշերային ժամերին այն վերադառնում է»,- բացատրել է Մուրադյանը և նշել, թե ինչպես կարելի է խուսափել գիշերը շատ ուտելուց․
«Երբեմն մարդը սննդի կարիք չի ունենում, բայց օրգանիզմը հեղուկ է պահանջում: Այդ պատճառով շատերը շփոթում են քաղցի եւ ծարավի զգացողությունը: Երբեմն գիշերը քաղցը հագեցնելու համար բավարար է մեկ գավաթ եռացրած ջուր խմել: Կարելի է նաեւ տաք կաթ կամ անյուղ կեֆիր խմել:
Եթե օրվա ընթացքում քիչ եք սնվում, պետք չէ տանջել ստամոքսը: Կարելի է բանջարեղենով, հատիկային հացով սենդվիչ կամ շիլա ուտել: Բայց հետեւեք, որ դա սովորություն չդառնա:
Ձգտեք, որպեսզի երեկոյան աչքի առաջ ոչ մի համեղ եւ գայթակղիչ բան չլինի, թաքցրեք բոլոր կոնֆետներն ու թխվածքները:
Քնելուց առաջ մաքրեք ատամները. դա օրգամիզմին ազդակ կհաղորդի, որ ուտել այլեւս չի կարելի եւ հանգստի պատրաստվելու ժամանակն է»,- մանրամասնել է դիետոլոգը:
0Comments