Իրանի և Ադրբեջանի արտաքին գործերի նախարարները քննարկել են երկու հարևանների միջև թյուրիմացությունները շտկելու և հարաբերությունների բնականոն ընթացքն ապահովելու ծրագրերը։ Այս մասին գրում է Tasnim գործակալությունը:
Հինգշաբթի երեկոյան Իրանի արտգործնախարար Հոսեյն Ամիրաբդոլլահիանը և նրա ադրբեջանցի գործընկեր Ջեյհուն Բայրամովը հեռախոսազրույցի ընթացքում խոսել են Թեհրանի և Բաքվի միջև հարաբերություններում վերջին զարգացումների մասին։
Երկարատև զրույցի ընթացքում բարձրաստիճան դիվանագետներն ընդգծել են խնդիրների լուծման նպատակով Իրանի և Ադրբեջանի միջև տարբեր ոլորտներում տեխնիկական և փորձագիտական պատվիրակությունների փոխանակման անհրաժեշտությունը։
Ամիրաբդոլլահիանը և Բայրամովը համակարծիք են եղել, որ մեդիա մթնոլորտի ճիշտ կառավարումը կառուցողական կլինի: Նրանք քննարկել են փոխադարձ հետաքրքրություն ներկայացնող հարցերը և ընդգծել թյուրիմացությունները վերացնելու և երկու երկրների միջև հարաբերությունները դեպի բնականոն հուն ուղղելու անհրաժեշտությունը, ինչը համապատասխանում է բարիդրացիությանը և փոխադարձ շահերին։
Երկուշաբթի Twitter-ի իր միկրոբլոգում Իրանի արտգործնախարարության խոսնակ Նասեր Քանանին դատապարտել է Իսրայելի՝ Իրանի և Ադրբեջանի միջև հարաբերությունները սրելու փորձերը: Նա ընդգծել է, որ Ադրբեջանի ժողովուրդը պետք է վախենա Սիոնիստական ռեժիմից, ոչ թե քաղաքակիրթ ու իսլամական Իրանից։
Իրանի և Ադրբեջանի ԱԳ նախարարները քննարկել են երկրների միջև թյուրիմացությունները շտկելու հնարավորությունները
Մանրամասներ
0Comments