Կանանց վեցամսյա ծառայությունը հիմք է հանդիսանում, որ հաշվառումից հետո նրանք հանդիսանան լիիրավ և հավասարազոր պահեստազորի անդամ։ Այս մասին այսօր ԱԺ պաշտպանության ու անվտանգության հարցերի հանձնաժողովի նիստի ժամանակ ասաց ՀՀ պաշտպանության նախարար Սուրեն Պապիկյանը՝ պատասխանելով ԱԺ «Հայաստան» խմբակցության պատգամավոր Գեղամ Մանուկյանի հարցին՝ արդյո՞ք վեսամսյա ծառայությունից հետո կանայք ենթակա են լինելու համընդհանուր մոբիլիզացիայի կամ վարժական հավաքների, թե նրանց կապը Զինված ուժերի հետ ավարտվելու է։
«Իգական սեռի այն ներկայացուցիչները, որոնք կանցնեն վեցամսյա պատրաստությունը, կլինեն մեր պահեստազորում, ամրագրում կստանան և անհրաժեշտության դեպքում կզորակոչվեն», - ասաց նախարարը։
Հարցին՝ իրականացվում են արդյոք որոշակի շինաշխատանքներ կանանց գումարտակի տեղակայման վայրի համար, Սուրեն Պապիկյանը պատասխանեց, որ աշխատանքներն արդեն մեկնարկել են․
«Վաղուց արդեն նախորոշված է այն զորամասի տարածքը, որին կցված է կանանց վաշտը, որը հիմքն է դառնում կանանց գումարտակի, հետագայում՝ կանանց գնդի։ Հենց այս կանանց գումարտակի զինծառայողներն էլ հանդիսանալու են ուսումնական գումարտակի վարչակազմը», - ասաց Պապիկյանը։
Գեղամ Մանուկյանը նաև անդրադարձավ այն հարցին, որ համաձայն նախագծի առողջական խնդիրներից ելնելով կանայք կարող են ծառայությունը վաղաժամ ավարտել բայց ստանալ պատվովճար, ուստի հղիությունը ևս կարող է ծառայությունը չշարունակելու համար առողջական պատճառ հանդիսանալ։
«Դիցուք, ամուսնացած որևէ կին դիմում է ներկայացնում, անցնում է ծառայության, բնականաբար վեցամսյա ծառայության ընթացքում նրան տրվում է կարճաժամկետ արձակուրդ, վերադառնում է և պարզվում՝ հղի է։ Բնականաբար առողջական պատճառ է համարվում, ծառայությունը չի կարողանում շարունակել», - նկատեց պատգամավորը, ինչին ՊՆ ղեկավարն արձագանքեց․
«Եթե ունենանք նման ուրախալի դեպքեր, բնականաբար, կողջունենք»։
Գեղամ Մանուկյանի այն դիտարկմանը, թե հետո այնպես չլինի, որ նման դեպքերը չափազանց շատ լինեն, նիստը նախագահող Ադրանիկ Քոչարյանը պատասխանեց․
«Ավելի շատ կողջունենք»։
0Comments