Իրանում իշխանություններն ավելի քան 100 մարդու են ձերբակալել դպրոցներում աշակերտների թունավորման կասկածանքով։ Այս մասին հաղորդում է իրանական IRNA լրատվական գործակալությունը։
Իրանի ՆԳՆ-ի վարկածով, ձերբակալվածներից ոմանք պարզապես «չարաճճիություն անելու նպատակով» տհաճ հոտ ունեցող, սակայն անվնաս նյութեր են կիրառել, մինչդեռ մյուսները թունավորող նյութեր են կիրառել «բնակչության և աշակերտների շրջանում սարսափ տարածելու, դպրոցները փակելու և Իրանի նկատմամբ թերահավատություն ստեղծելու համար»։ Վերջինների դեպքում ստուգումներ են իրականացվում ահաբեկչական կազմակերպությունների հետ կապերի առկայությունն ստուգելու համար։
Իրանում զանգվածային թունավորումների հետևանքով տուժել է ավելի քան 1000 դպրոցական, որոնց մեծամասնությունն աղջիկներ էին։ Տուժածներից ոմանք հիվանդանոցային բուժման կարիք են ունեցել։
Ավելի վաղ Իրանի գերագույն առաջնորդ, այաթոլլա Ալի Խամենեին մահապատիժ է պահանջել զանգվածային թունավորումների մեղավորների համար, եթե պարզվի, որ դրանք կանխամտածված են իրականացվել։
0Comments