Ֆրանսիայի թիմը չի կարող վնասվածք ստացած էրնանդեսի փոխարեն հայտավորել նոր խաղացողի

Աշխարհի չեմպիոն Ֆրանսիայի հավաքականի գլխավոր մարզիչ Դիդիե Դեշամը չի կարողանա նոր խաղացողի հայտավորել վնասվածք ստացած պաշտպան Լուկաս Էրնանդեսի փոխարեն։ Հայտացուցակների փոփոխության վերջնաժամկետը նոյեմբերի 21-ն էր, հաղորդում է RMCSport-ը։

Գերմանիայի չեմպիոն Մյունխենի «Բավարիայի» ֆուտբոլիստը ծնկի վնասվածք էր ստացել Ֆրանսիա - Ավստրալիա (4:1) հանդիպման արդեն 13-րդ րոպեին եւ փոխարինվել։ Նրա համար աշխարհի առաջնությունն ավարտված է։

Ֆրանսիայի հավաքականն այս աշխարհի առաջնությանը մասնակցում է առանց հիմնական կազմի խաղացողներ Նգոլո Կանտեի, Պոլ Պոգբայի, Մայք Մենյանի, Քարիմ Բենզեմայի, Կրիստոֆեր Նկունկուի, Պրեսնել Կիմպեմբեի։ Բոլորը վնասվածքների պատճառով չեն խաղում։

Հաջորդ հանդիպումը Ֆրանսիայի հավաքականը կանցկացնի նոյեմբերի 26-ին Դանիայի դեմ։