Հայաստանը ադրբեջանական ագրեսիայի զոհ է, իսկ մեր անտարբերությունը ողբալի է՝ հայտարարել է Ֆրանսիայի Սենատի անդամ Ժան Լուի Մասոնը:
«Այս նախագիծը շատ կարևոր է։ Բռնապետ Ալիևը պետք է պատասխանատվության ենթարկվի: Թուրքիայի դերը նույնպես չպետք է անտեսել: Էրդողանը Թուրքիայի հարևանությամբ գտնվող բոլոր տարածքներում կարծես թե փորձում է կոնֆլիկտային օջախներ ստեղծել: Նա չի ընդունում 1915 թվականի ոճրագործությունը: Կարծես, երկրորդ Ցեղասպանությունն են իրականացնում հայերի նկատմամբ, ինչպես նաև երրորդ ցեղասպանությունը՝ քրդերի նկատմամբ:
ՆԱՏՕ-ի և Եվրամիության վերաբերմունքը Հայաստանի նկատմամբ խտրական է: Օրինակ՝ Ռուսաստանին դուրս ենք թողել Եվրոպայի խորհրդից, բայց նույնը չենք անում Ադրբեջանի և Թուրքիայի դեպքում: Ամենավատն այն է, որ նույնիսկ բնական գազի գնման ծավալներն ենք կրկնապատկում: Երբ համեմատում ենք՝ ինչ է տեղի ունենում Ուկրաինայում և Հայաստանում, կարող ենք ասել, որ Ֆրանսիան և Եվրոպայի խորհուրդը հավանություն են տալիս այն ամենին, ինչ տեղի է ունենում, անտեսում ենք պատերազմական հանցագործությունները: Այսօր ստեղծված իրավիճակի համար բարոյական պատասխանատվություն են կրում ԵՄ ղեկավարները»,- ասել է սենատորը։
Սենատորը հայտարարությունն արել է Ֆրանսիայի Սենատում կայացած՝ Հայաստանի օկուպացված տարածքներից Ադրբեջանի զինված ուժերի անհապաղ դուրսբերման, հրադադարի մասին 2020 թվականի նոյեմբերի 9-ի համաձայնագրի կիրարկման ապահովման և Ադրբեջանի դեմ պատժամիջոցներ սահմանելու կոչով բանաձևի քննարկման ժամանակ:
0Comments