Չինաստանը մտադիր չէ որեւէ հատուկ քայլ ձեռնարկել Արեւմուտքի հակառուսական պատժամիջոցները շրջանցելու համար, Պեկինը կշարունակի նորմալ առեւտրային հարաբերություններ զարգացնել Ռուսաստանի Դաշնության եւ մյուս երկրների հետ, լրագրողներին ասել է Չինաստանի արտաքին գործերի նախարարության՝ Եվրոպայի դեպարտամենտի տնօրեն Վան Լուտունը, փոխանցում է «Ինտերֆաքս»-ը:
«Մենք որեւէ հատուկ բան չենք անի Ռուսաստանի դեմ ԱՄՆ-ի եւ Արեւմուտքի պատժամիջոցները շրջանցելու համար»,- ասել է նա նախօրեին կայացած Չինաստան-ԵՄ գագաթնաժողովին նվիրված ճեպազրույցի ժամանակ:
Վան Լուտունն ասել է, որ «դա չպետք է անդրադառնա այլ երկրների հետ Չինաստանի նորմալ տնտեսական համագործակցության վրա»՝ նշելով, որ Եվրոպան շարունակում է առեւտուրը Ռուսաստանի հետ, ուստի պատժամիջոցները «չպետք է ազդեն Մոսկվայի հետ Չինաստանի նորմալ առեըտրային հարաբերությունների վրա»։
Դիվանագետը հիշեցրել է, որ «Չինաստանը հակամարտության կողմ չէ», այն իր ներդրումն է ունենում համաշխարհային առեւտրի զարգացման գործում եւ հետեւողականորեն դեմ է պատժամիջոցների կիրառմանը։
Վան Լուտունը նշել է, որ Չինաստանը միշտ հանդես է եկել բանակցությունների եւ խորհրդակցությունների միջոցով բոլոր հակամարտությունների կարգավորման օգտին, իսկ Պեկինը ողջունում է ռուս-ուկրաինական բանակցությունները։ Միաժամանակ նա ասել է, որ չի կարելի գերագնահատել Ռուսաստանի վրա ազդելու Չինաստանի կարողությունը. պետք չէ մտածել, որ եթե Պեկինը Մոսկվային խնդրի դադարեցնել ռազմական գործողությունները, ապա ՌԴ կլսի իրեն։
0Comments