«Գազային» ցույցեր. ջարդեր, հրկիզումներ, պայթյուններ, սպանություններ, նախագահական նստավայրի գրոհ

Ղազախստանում 2022 թվականի առաջին օրերից ծայրաստիճան լարված իրավիճակ է ստեղծվել։ Մանգիստաուի շրջանի Ժանաոզեն եւ Ակտաու քաղաքների բնակիչները բողոքում են հեղուկ նավթային գազի գների կրկնակի բարձրացման դեմ։ 

Ղազախստանի նախագահ Քասըմ-Ժոմարտ Տոկաեւը հանձնարարել է ստեղծել կառավարական հանձնաժողով՝ իրավիճակը քննարկելու համար։ Հունվարի 4-ին նա հայտարարել է, որ պատրաստ է կատարել ցուցարարների հիմնական պահանջը եւ նվազեցնել գազի գինը։ 

Հունվարի 5-ի առավոտյան Տոկաեւը պաշտոնանկ է արել կառավարությունը եւ ասել, որ կաբինետը հատկապես մեղավոր է բողոքի իրավիճակ թույլ տալու համար։

Արտակարգ դրություն է հայտարարվել Ալմաթիի Մանգիստաու շրջանում, այնուհետեւ Նուր Սուլթանում։ 

Այսօր՝ հունվարի 5-ին, իրավիճակը հատկապես լարվել է Ալմաթիում, որտեղ ցուցարարները սկսել են գրոհել քաղաքապետարանի շենքը, իսկ հետո ամբողջությամբ ներխուժել նախագահական նստավայր ու այրել երկու շենքերը։

Երկիրն անջատել է ինտերնետն ու հեռախոսային կապը, դադարեցրել մի քանի ալիքների հեռարձակումը։ Լրատվական գործակալությունների կայքեր մուտք գործելը դարձել է անհնար։

Ցուցարարները թալանել են հեռուստաալիքների, այդ թվում՝ «Միր» հեռուստաալիքի տարածքները, վնասել են տեխնիկա, զինաթափել ոստիկաններին եւ ներխուժել զենքի խանութներ։

Ալմաթիի հրամանատարը հայտնել է, որ անկարգությունների ժամանակ տուժել է 500 խաղաղ բնակիչ, այդ թվում՝ կանայք եւ երեխաներ։  

Նախագահ Տոկաեւը երկու անգամ դիմել է ժողովրդին: Նա հայտարարել է, որ Նուրսուլթան Նազարբաեւի փոխարեն ինքը կգլխավորի երկրի անվտանգության խորհուրդը։

Նա խոսել է նաեւ անկարգությունների ժամանակ իրավապահների սպանությունների եւ զինվորականների նկատմամբ բռնությունների մասին։

«Սա վկայում է ֆինանսական դրդապատճառներով դավադիրների կողմից մանրակրկիտ մտածված գործողությունների ծրագրի մասին»,- ասել է Տոկաեւը։

Մի շարք երկրներ եւ ԵԱՀԿ-ն իրենց մտահոգությունն ու աջակցությունն են հայտնել Ղազախստանում ստեղծված իրավիճակի կապակցությամբ։

Ռուսաստանը, մասնավորապես, հայտարարել է, որ ուշադիր հետեւում է երկրում տեղի ունեցող իրադարձություններին, իսկ ԵԱՀԿ-ն կոչ է արել ապաէսկալացնել իրավիճակը։

Ավելի ուշ լրատվամիջոցները հայտնել են ցուցարարների կողմից Ալմաթիի օդանավակայանը գրավելու մասին։

News.am