Հայաստան մտնող բեռնատարների համար տուրքերի նոր համակարգ կգործի

Մանրամասներ
Live24-ը ներկայացնում է

ա

Հայաստանի կառավարությունը մտադիր է փոխել երկիր մուտք գործող բեռնատարներից տուրքերի գանձման համակարգը։ Տեղեկությունը Sputnik Արմենիայի հետ զրույցում հայտնել է տարածքային կառավարման եւ ենթակառուցվածքների նախարար Գնել Սանոսյանը։

«Սա ընդհանուր պրոցես է` միայն Իրանից տեղափոխվող բեռների հետ չէ կապված։ Հայաստանը որոշակի միջազգային պարտավորություններ ունի, եւ այդ շրջանակներում քննարկումներ կան օրենսդրական նախաձեռնություն ծավալելու։ Այն դեռ ավարտական տեսքի չի բերվել»,–ասել է Սանոսյանը։

Նա հայտնել է` փոփոխության էությունն այն է, որ եթե հիմա բեռնատարների մուտքի համար է վճար սահմանված, ապա նախատեսում են սահմանել տուրք բեռի քաշի եւ մեքենայի` մեր երկրում վարած կիլոմետրի համար։ Նման համակարգ, ըստ նախարարի, մի շարք երկրներում է գործում։

Սանոսյանը նշել է` սա, մի կողմից, կարծես արդարացի է, մյուս կողմից կա խնդիր` այս դաշտում պետք է հայտնվեն նաեւ տեղական, ներքին բեռնափոխադրումները։

«Այս հարցը դեռ քննարկման փուլում է, մենք կլսենք նաեւ մեր գործընկերների կարծիքը եւ նոր որոշում կկայացնենք»,–ասել է նախարարը։

Ավելի վաղ Սանոսյանն այս հարցը քննարկել էր Իրանի մաքսային ծառայության ղեկավար Մեհդի Միրաշրաֆիի գլխավորած պատվիրակությանը հյուրընկալության ժամանակ, երբ իրանական կողմը բարձրացրել է իրանցի բեռնատարներից գանձվող ֆիքսված գումարի հարցը։

Իր հերթին էկոնոմիկայի նախարար Վահան Քերոբյանը հայտարարել է, որ Հայաստանն ու Իրանը քննարկում են երկկողմ տրանսպորտային փոխադրումների ազատականացման հարցը։