Ո՞ւմ է ասում դասալիք, իմ երեխայի՞ն. գերիների, անհետ կորածների հարազատների ակցիան՝ Կառավարության դիմաց. ՈՒՂԻՂ

Իմ երեխան կռվել է մինչև վերջին փամփուշտը և այնքան բան է արել, որ իրենք բոլորով չեն կարողանա անել
Live24.am-ը ներկայացնում է

ա

Ալեն Սիմոնյանն այսօր հայտարարել է, որ մենք գերի չունենք։ Իմ երեխան չկա տարի երկու ամիս է, մենք հավաքվել ենք մեր բողոքի ձայնը բարձրացնելու ու ասելու, որ էսպես չի կարելի։ Այս մասին լրագրողների հետ զրույցում, անդրադառնալով ԱԺ նախագահ Ալեն Սիմոնյանի` գերիների վերաբերյալ հնչեցրած հայտարարություններին, ասաց Կառավարության դիմաց հրավիրված բողոքի ակցիայի կազմակերպիչներից, անհետ կորած զինծառայողի հարազատ Արսեն Ղուկասյանը։

«Ում է ասում դասալիք, իմ երեխայի՞ն, իմ երեխան կռվել է մինչև իր վերջին փամփուշտը ու հայտնի չէ, թե ուր է։ Իմ երեխան այնքան բան է արել, որ իրենք բոլորով հավաքվեն, չեն կարողանա անել։ Թող ծառայակիցներին հարցնեն, ինչ զոհողությունների է գնացել իմ երեխան»,–ասաց նա։

Անհետ կորածների և գերի ընկած զինվորների ծնողներն իրենց հետ բերել էին զինվորների նկարները և պատրաստվում էին դրանք փակցնել Կառավարության շենքի վրա, ինչին ոստիկաները միջամտեցին և թույլ չտվեցին։

«Ով այսօր այնպես կանի, որ ես իմ երեխայից լուր չունենամ, ինքը ազգային տականք է։ Բոլորիդ երեխաները տանն են, հանգիստ նստած եք, թող մեկի երեխան մի քանկ օր տուն չգա, տեսնեմ ինչ կանեք, տարի երկու ամիս է երեխայիցս լուր չունեմ։ Թող գնան բերեն, գործը քննեն հասկանան՝ զենքը ինքնակամ գցել է, հանձնվե՞լ, դատեն, հարց չկա, բայց բերեք։ Բայց, եթե պարզվի, որ այդ զինվորն ինքը չի հանձնվել, այլ սարքել են գլխին, որ իրենց կեղտոտ գործերն անեն, ինչ են անելու։ Թող պարզվի, որ իմ երեխան սխալ է արել, դավաճանել է հայրենիքին, դատեն ամենախիստ ձևով, բայց ոչ թե տարի երկու ամիս տանեն բերեն, վերջում ասեք գերի չունենք, այդ 300 հոգին ասեղ էին, որ կորան։ Երկիրը կործանվում է, բոլորը կանգնած իրար երեսի են նայում»,- ասաց Արսեն Ղուկասյանը։

Նա նշեց, որ այս պահին մարզերից Երևան են ժամանում անհետ կորածների և գերիների ծնողները՝ մասնակցելու Կառավարության դիմաց կազմակերպված բողոքի ակցիային։

Նշենք, որ այսօր համացանցում տարածվել էր տեսանյութ, որտեղ ԱԺ նախագահ Ալեն Սիմոնյանը անդրադառնալով գերիների հարցին, նշել է, որ բոլոր գերիների նկատմամբ պետք է քննություն իրականացվի և քրեական պատասխանատվության ենթարկվեն։