Մեզ այսքան խոստումներ տվեցին, որ կզանգեն, կօգնեն, բայց մինչև հիմա ոչինչ չի եղել, դրա համար էլի հավաքվել ենք, որ պարոն Փաշինյանի հետ հանդիպենք: Այս մասին այսօր լրագրողների հետ զրույցում ասաց Կառավարության դիմաց հավաքված ակցիայի մասնակից-կազմակերպիչներից Դավիթ Հարությունյանը:
Նշենք, որ նրանք բողոքում են փակ սահմանների դեմ և ցանկանում են ՌԴ մեկնել: Նրանցից մի քանիսը անցած շաբաթ հրավիրվել էին Կառավարության անդամների հետ քննարկման, սակայն մինչև այսօր չեն ստացել իրենց խնդրի լուծումը:
«Մենք ուզում ենք, որ մեզ մարդու տեղ դնեն: Այսօր եկել ենք մի մարդու նկարով, որը մահացել է այն ժամանակ, երբ իրենց վրացական կողմը թույլ չի տվել անցնել սահմանը: Մենք այսօր հարցի լուծում ենք ուզում և այս մարդու կյանքը պետք է բոլորին դաս լինի, եթե չեն ուզում, որ էլի նման բան լինի, պետք է քայլեր սկսեն»,- ասաց նա:
Ակցիայի մասնակիցը նշեց՝ այսօր վերջին անգամ է գալիս իր պահանջով, որովհետև հիասթափվել է կառավարությունից և նույն կերպ յուրաքանչյուր գնացող քաղաքացի, այլևս չի վերադառնա հայրենիք:
«Անցած շաբաթ մեր գլխի տակ փափուկ բարձ դրեցին ու ասացին՝ գնացեք: Այսօր 2200 մարդ ցանկանում է հետ վերադառնալ և այս քանակը քիչ-քիչ ավելանում է: Անօրինական բաներ են կատարվում: Եթե կառավարությունն իր օրենքները չի հարգում, ժողովուրդը ո՞նց հարգի: Հասկացեք, որ սխալ է մարդկանց արհամարելը, հեղափոխության ընթացքում տված խոստումները պետք է կատարել, մարդկանց պետք է հարգել»,- ընդգծեց նա:
0Comments