Մենք խնդիր ենք դրել, որ արդեն 2021 թվականի առաջին եռամսյակում ունենանք նոր Պարեկային ծառայություն, ինչը նշանակում է, որ ոստիկանության ամբողջ արտաքին ծառայությունը, պետք է ամբողջությամբ փոխվի, ընդ որում պետք է փոխվի ինչպես ձևով, այնպես էլ՝ բովանդակությամբ: Կառավարության նիստին այսօր հայտարարեց ՀՀ վարչապետ Նիկոլ Փաշինյանը։
Փաշինյանն ասաց, որ դրա առաջին փուլը կրթական փուլն է. «Մեր նախնական պայմանավորվածությամբ այն պետք է մեկնարկեր ապրիլից, սակայն կորոնավիրուսի պատճառով մի քիչ հետաձգվեց»:
Վարչապետը նշեց, որ Պարեկային ծառայության ամբողջ ենթակառուցվածքը պետք է լինի ամբողջությամբ նոր՝ սկսած տեխնիկական միջոցներից, ավտոմեքենաներից, հագուստից. «Երկրորդ փուլում մենք կստեղծենք Ներքին գործերի նախարարություն: Հետագա ամբողջ քաղաքականությունը կիրականացնի ՆԳ նախարարությունը»:
Փաշինյանի խոսքերով, ՆԳՆ ստեղծելու հարցում մշտապես կոնֆլիկտ է եղել խնդրի քաղաքական և զինվորական մասի բովանդակությունների միջև. «Խնդիր է եղել այնպես անել, որ զինվորական ծառայությունը դուրս լինի քաղաքական ազդեցություններից:
Ի վերջո մենք հրաժարվել ենք այն տրամաբանությունից, որ հնարավորություն ստանանք քաղաքացիական անձանց նշանակել ոստիկանությունում, առավել ևս՝ ղեկավարի կարգավիճակով: Բայց մյուս կողմից ունենք իրավիճակ, երբ ոստիկանությունը ոլորտում քաղաքականություն մշակող մարմին չէ:
Այս կոնֆլիկտը լուծելու համար մենք որոշեցինք, որ կունենանք Ներքին գործերի նախարարություն:
Այստեղ քաղաքական և քաղաքացիական հատվածը հստակ կտարանջատվի զինվորական հատվածից: ՀՀ Ոստիկանությունը կլինի հատուկ հարաբերությունների մեջ ՆԳՆ-ի հետ, կլինի դրա կազմում: Այդ հարաբերությունները կլինեն մոտավորապես այնպիսին, ինչպիսին է ՊՆ-ի և Գլխավոր շտաբի միջև հարաբերությունները»:
0Comments