Փաշինյանի սելֆին՝ Միշուստինի հետ. ՏԵՍԱՆՅՈՒԹ

Ալմաթիում մեկնարկել է ՀՀ վարչապետ Նիկոլ Փաշինյանի հանդիպումը՝ ՌԴ վարչապետ Միխայիլ Միշուստինի հետ
միշուստին

Ալմաթիում մեկնարկել է ՀՀ վարչապետ Նիկոլ Փաշինյանի հանդիպումը՝ ՌԴ վարչապետ Միխայիլ Միշուստինի հետ: Այն առաջինն է Ռուսաստանի վարչապետի պաշտոնում Միշուստինի նշանակումից հետո: Երկու երկրների վարչապետները միմյանց ողջունելուց հետո համատեղ սելֆի արեցին:

ՀՀ վարչապետ Նիկոլ Փաշինյանը շնորհավորեց Միշուստինին Ռուսաստանի կառավարության ղեկավարի պաշտոնում նշանակվելու առիթով: «Մեր կառավարությունների և երկրների միջև միշտ եղել և լինելու են լավ ու ջերմ հարաբերություններ, բայց ես կարծում եմ, որ միշտ կա հնարավորություն ՝ նոր մակարդակի բարձրացնելու այդ հարաբերությունները: Ձեզ հետ համագործակցությամբ մենք կարողանալու ենք դա անել: Մեր պետությունների միջև հարաբերությունները զարգանում են ըստ պլանավորածի՝ շատ լավ: Առևտրաշրջանառությունը 2019թ. մոտենում է երկու միլիարդի, որը բավական լավ ցուցանիշ է: 2020թ. այդ դինամիկան կպահպանվի»,-«Արմենպրես»-ի հաղորդմամբ՝ ասաց ՀՀ վարչապետը:

Նա հույս հայտնեց, որ մոտ ապագայում կհանդիպեն նաև Երևանում, քանի որ այս տարի Եվրասիական միջկառավարական խորհրդի նիստերից մեկը կանցկացվի Հայաստանի մայրաքաղաքում:

ՌԴ վարչապետ Միխայիլ Միշուստինը նշեց, որ ջերմությամբ է հիշում իր վերջին այցը Հայաստան՝ մասնակցելու Տեղեկատվական տեխնոլոգիաների համաշխարհային ֆորումին՝ WCIT-ին, որը փայլուն էր կազմակերպված: «Հայաստանն ու Ռուսաստանը կապված են շատ սերտ և դաշնակցային կապերով: Ռուսաստանը Հայաստանի գլխավոր առևտրային գործընկերն է, ՌԴ նոր կառավարությունը տրամադրված է կառուցողական գործընկերության»,-ընդգծեց նա:

Երկու երկրների վարչապետները Ղազախստանում մասնակցում են Եվրասիական միջկառավարական խորհրդի նիստին: