Այս օրինագծերի փաթեթով մենք ցանկանում ենք դպրոցականներին ավագ դպրոցում ուսումն ավարտելուց հետո վճարովի հիմքով քոլեջ կամ մասնագիտական ոսւումնարան ընդունվելու հնարավորություն ընձեռել։ Այս մասին Կրթության, գիտության, մշակույթի, սփյուռքի, երիտասարդության և սպորտի հարցերի խորհրդարանական մշտական հանձնաժողովի նիստում, «Կրթության մասին» և հարակից օրենքներում փոփոխություններ և լրացումներ մտցնելու մասին օրինագծերի փաթեթի քննարկման ժամանակ, դեկտեմբերի 23-ին ասաց օրինագծի համահեղինակ, խորհրդարանական հանձնաժողովի ղեկավար, իշխող «Իմ քայլը» դաշինքի պատգամավոր Մխիթար Հայրապետյանը, փոխանցում է news.am-ը:
Նրա խոսքով՝ սահմանադրական բարեփոխման համատեքստում պետությունն ամրագրել է անվճար հիմունքներով միջնակարգ կրթություն կազմակերպելու և տրամադրելու և միաժամանակ պարտադիր կրթության մակարդակը բարձրացնելու պարտավորություն օրենքի շրջանակում (9-ամյա նախնական կրթությունից մինչև 12-ամյա միջնակարգ կրթություն)։ Դրա հաշվին, ինչպես նշեց պատգամավորը, պետությունը ստեղծել է երաշխիքներ և հիմքեր, որպեսզի երեխաները, ներգրավվելով կրթական գործընթացում, հետագայում դառնան այն զարգացած և գործուն երիտասարդությունը, որը կարող է լուծել սոցիալական խնդիրները։
«Միևնույն ժամանակ, պարզելով միջնակարգ կրթության պահանջարկը պրոֆեսիոնալ կրթություն ստանալու հնարավորության հետ միասին՝ մրցութային հիմքով, մենք բախվեցինք հակասության։ Ճիշտ նույն կերպ մասնավոր և պետական դպրոցները կարող են կազմակերպել իրենց ծառայությունները վճարի հիման վրա, և դա չի խախտի սահմանադրական նորմերը, քանի որ կոնկրետ դեպքերի և պայմանների առանձնահատկությունները կարող են սահմանվել օրենքի շրջանակում։ Բայց, ըստ էության, գրանցումը սահմանափակ է պետական միջոցների անբավարարության և տեղերի սահմանափակ քանակության պատճառով»,- պարզաբանել է Հայրապետյանը։
Խորհրդարանականների օրենսդրական առաջարկությունը հանդիպեց Հայաստանի կրթության, գիտության, մշակույթի և սպորտի նախարար Արայիկ Հարությունյանի սկզբունքային և բավական համառ դիմադրությանը, որը մտահոգություն հայտնեց այդ օրենսդրական նախաձեռնության առիթով՝ ասելով, որ առաջադրված օրենսդրական փաթեթը ոչ միայն չի լուծում առկա խնդիրները, այլև ստեղծում է նորերը՝ ավելացնելով «գլխացավանքը» նախարարության համար։
Նախարարը մասնավորապես ասաց, որ ծնողները Հայաստանում հաճախ հաշվի չեն առնում շուկայի պահանջները և պարտադրում են իրենց երեխային այն կրթությունը և այն մասնագիտությունը, որը ոչ միայն մրցունակ չէ և պահանջված չէ աշխատանքի շուկայում, այլև երեխային էլ հետաքրքիր չէ, որը չի ցանկանում իր ժամանակը ծախսել իրեն ոչ պիտանի մասնագիտության վրա։
Հարությունյանը բազմիցս նշել է, որ հանրապետությունը լիքն է գործազուրկներով, որոնք չեն կարողնաում գործնականում կիրառել իրենց ունեցած մասնագիտական կրթությունը։
«Հիմա դուք առաջարկում եք ավելացնե՞լ այդ դժբախտ մարդկանց թիվը։ Մենք պետք է հաշվի առնենք շուկայի պահանջները և ելնենք բացառապես դրանից... Այս օրենսդրական լրացումն իմաստ չունի, քանի որ, վերջնարդյունքում, մենք պետք է որոշենք, թե որ մասնագիտություններն են պահանջված, իսկ որոնք՝ ոչ»,- ասաց նախարարը։
Հարությունյանի հայտարարությունը դուր չեկավ պատգամավորներին, որոնք նրան հեղեղեցին հարցերով։ Քննարկումը ձգձգվեց։ Բոլոր կողմերը ներկայացնում էին իրենց փաստարկները և հիմնավորումները։ Խորհրդարանականները հայտարարում էին, որ Հարությունյանի գլխավորած նախարարությունը պարզապես ցանկանում է ազատվել լրացուցիչ պարտավորություններից և չի փորձում լուծել առկա խնդիրը։ Միևնույն ժամանակ, նրանք ընդգծեցին, որ քաղաքացիները պետք է գոնե իրավունք ունենան իրենք որոշելու, թե ինչ կրթություն են ցանկանում ստանալ և ինչպես։
Պատգամավորների առաջարկած օրենսդրական փաթեթը, վերջնարդյունքում, ստացավ խորհրդարանական հանձնաժողովի դրական եզրակացությունը։
0Comments