Ավելորդ քաշի դեմ մարդիկ սովորաբար պայքարում են ոչ միայն ճիշտ սննդակարգի, այլև մարզումների միջոցով, սակայն այժմ մասնագետները պարզել են, թե օրվա որ ժամին է պետք մարզվել առավել լավ արդյունքի հասնելու համար: Բաթի և Բիրմինգհեմի համալսարանների գիտնականների հետազոտությունը ցույց է տվել, որ նախաճաշից առաջ մարզվելը կարող է շատ ավելի արդյունավետ լինել ավելորդ քաշի դեմ պայքարում: Բացի այդ, նախաճաշից առաջ մարզվելն օգնում է նաև վերահսկողության տակ պահել արյան մեջ շաքարի մակարդակը:
Հետազոտությունը ցույց է տվել, որ այն տղամարդիկ, որոնք մարզվում են մինչ նախաճաշելը, երկու անգամ ավելի շատ ճարպ են այրում, քան նրանք, ովքեր օրվա այլ ժամերին են մարզվում: Սա վկայում է այն մասին, որ մարզումների ժամը փոփոխելը թույլ կտա շատ ավելի արագ հասնել ցանկալի արդյունքին:
6 շաբաթ տևած հետազոտությանը մասնակցել է ճարպակալումով կամ ավելորդ քաշով 30 տղամարդ, որոնց մասնագետները բաժանել են երկու խմբի: Առաջին խմբի մասնակիցները մարզվում էին մինչ նախաճաշելը, իսկ երկրորդ խմբի մասնակիցները՝ նախաճաշից հետո: Առաջին խմբի տղամարդկանց մոտ գիտնականներն առավել լավ արդյունք են գրանցել, ինչը մասնագետների կարծիքով պայմանավորված է նրանով, որ դատարկ ստամոքսին մարզվելու դեպքում ինսուլինի մակարդակն ավելի ցածր է լինում: Այս ամենի հետևանքով էներգիա ստանալու համար օրգանիզմն օգտագործում էր ճարպային հյուսվածքների ճարպը, այլ ոչ թե մկաններում պարունակվող ճարպերը:
Գիտափորձերը ցույց են տվել, որ ենթամաշկային ճարպի դեմ պայքարում վաղ առավոտյան մարզումները գերարդյունավետ չեն, սակայն դրանք դրական ազդեցություն են ունենում ընդհանուր առողջական վիճակի վրա: Վաղ առավոտյան մարզվելու դեպքում օրգանիզմն ավելի լավ է արձագանքում ինսուլինին և թույլ է տալիս պահել արյան մեջ շաքարի մակարդակը վերահսկողության տակ, իսկ սա օգնում է զգալիորեն նվազեցնել սրտի հիվանդությունների ու շաքարային դիաբետի զարգացման հավանականությունը:
Նյութի աղբյուրը՝ medikforum.ru
0Comments