Հեյդարի կադրը՝ Իլհամի վարչապետ. Նովրուզ Մամեդովի հրաժարականը՝ մեծ հարցական

Ադրբեջանի վարչապետ Նովրուզ Մամեդովը հրաժարական է տվել։ Ինչպես տեղեկացրել են ադրբեջանական գործակալությունները՝ Իլհամ Ալիևը Միլի մեջլիս է ուղարկել նոր վարչապետի թեկնածություն։ Հարցը պաշտոնապես ներառված է Միլի մեջլիսի հերթական լիագումար նիստի օրակարգում։ Ադրբեջանի նախագահը ներկայացրել է նախագահի տնտեսական հարցերով օգնական Ալի Ասադովի թեկնածությունը վարչապետի պաշտոնում։

Նովրուզ Մամեդովը երկրի վարչապետն է 2018 թ. ապրիլից։ Նրա հրաժարականի պատճառները չեն նշվում: Մամեդովը, որ այժմ 72 տարեկան է, ղեկավարում էր կառավարությունը 2018-ի ապրիլից: Մինչ այդ նա աշխատել է Ադրբեջանի նախագահի աշխատակազմի արտաքին կապերի բաժնում:

Հոկտեմբերի 8-ին Ադրբեջանի խորհրդարանը վարչապետ է նշանակելու Ալի Ասադովին` նախագահ Իլհամ Ալիևի տնտեսական հարցերով օգնականին: Ասադովը 63 տարեկան է: Նա ծնվել է Նախիջևանում և 1978 թվականին ավարտել է Մոսկվայի ազգային տնտեսության ինստիտուտը: 2012-ից զբաղեցրել է Ադրբեջանի նախագահի աշխատակազմի ղեկավարի տեղակալի պաշտոնը:

Ադրբեջանում վարչապետի թեկնածությունը պաշտոնապես հաստատում է խորհրդարանը, իսկ նախագահը միայն իր համաձայնությունն է տալիս նշանակմանը: Այնուամենայնիվ, հաշվի առնելով այն փաստը, որ Ադրբեջանում իշխանությունը կենտրոնացած է նախագահ Ալիևի ձեռքում, վարչապետի պաշտոնը մշտապես զբաղեցնում է իշխող ընտանիքին մոտ կանգնած անձ:

Այսպիսով, Ալի Ասադովը միաձայն է ընտրվել: Նրա թեկնածությանը կողմ է քվեարկել 105 պատգամավոր: Խորհրդարանի նախագահ Օքթայ Ասադովն ընթերցել է նախագահ Իլհամ Ալիևի նամակը՝ կապված օրվա գլխավոր հարցի հետ, որից հետո հարցը դրվել է քննարկման, ապա քվեարկման և ընդունվել:

«Այսօր ելույթ ունենալով ձեր առջև՝ ես իմ խորին երախտագիտությունն եմ հայտնում նախագահ Իլհամ Ալիևին այս բարձր վստահության համար: Անցնող տարիներին նախագահ Իլհամ Ալիևի ղեկավարության ներքո մենք մի շարք գլոբալ նախագծեր ենք կյանքի կոչել, զարգացել է տնտեսության նավթային սեկտորը, երկիրը մուտք է գործել տիեզերական պետությունների ընտանիք: Նախագահ Իլհամ Ալիևի գլխավորությամբ մեր տնտեսությունը զարգացման տիտանական ուղի է անցել», - նշել է Ադրբեջանի նորանշանակ վարչապետը` մոտ 5 րոպե շարունակված ելույթի ընթացքում շուրջ 15 անգամ հիշատակելով երկրի նախագահի անունը:

Ալի Ասադովը վարչապետի պաշտոնում առաջին ելույթում չի մոռացել նաև հիշատակել Ղարաբաղի հարցը: Նրա խոսքով՝ Ադրբեջանի առջև ծառացած թիվ մեկ խնդիրը Ղարաբաղն է․ - «Ադրբեջանի ռազմական հզորության մեծացումը և երկրի տարածքային ամբողջականության վերականգնումը նախագահ Ալիևի ամենօրյա աշխատանքի առաջնահերթություններն են»:

Ինչպես և իր նախորդը, Ալի Ասադովը ևս ծնունդով Նախիջևանից է: 1978 թվականին նա ավարտել է Մոսկվայի ժողովրդական տնտեսության ինստիտուտը, 80-ականներին աշխատել է խորհրդային Ադրբեջանի Պետպլանում և Գիտությունների ակադեմիայում, հետագայում զբաղվել է նաև դասախոսական աշխատանքով: Անկախ Ադրբեջանում քաղաքականությամբ սկսել է զբաղվել Հեյդար Ալիևի իշխանության գալուց հետո: 1995-ին ընտրվել է Միլի մեջլիսի անդամ, իսկ երեք տարի անց արդեն աշխատանքի է անցել այն ժամանակ նախագահ՝ Հեյդար Ալիևի աշխատակազմում:

Հետաքրքրական է, որ Նովրուզ Մամեդովի հրաժարականի պատճառները չեն նշվում, կարծես մնում է մեծ հարցական: Մամեդովը համարվել է ադրբեջանական իշխանական վերնախավի ծանր հրետանի, նույնիսկ նրան ավելի ազդեցիկ էին համարում, քան օրինակ Ադրբեջանի արտգործնախարար Էլմար Մամեդյարովին:

Կարո՞ղ է Մամեդովի հեռացումը կապված լինել Ադրբեջանի իշխանական վերնախավում առկա կլանային պայքարի հետ, թե՞ Ալիևը դժգոհ էր նրա աշխատանքի անարդյունավետությունից... Դեռ տեղեկատվական արտահոսքեր կլինեն Ադրբեջանից:

Թամար Բագրատունի