Հազարավոր մարդիկ խորոված կանեն մսի հոտի համար հարեւաններին դատի տված վեգան կնոջ տան մոտ

^{Հազարավոր մարդիկ մտադիր են խորովածով մեծ պիկնիկ կազմակերպել վեգան կնոջ տան մոտ, որը դատի է տվել հարեւաններին այն բանի համար, որ նրանք խորոված են արել իրենց բակում։ Կնոջը անհարմարություն է պատճառել մսի եւ ձկան հոտը, որը, ըստ նրա, իրեն թույլ չի տվել վայելել լռությունն ու հանգիստը։}

^{Այս շաբաթ Սիլա Կարդենը հայտնվել է թերթերի վերնագրերում՝ պնդելով, որ խորովածի հոտը խախտել է իր կյանքի որակը, հայտնում է 9News-ը։}

^{Այժմ ավելի քան 3000 մարդ նախատեսում են Facebook-յան էջի միջոցով, որը նրանք անվանել են «Սիլա Կարդենի համար խորովածի միություն», խորովածի մեծ միջոցառում կազմակերպել նրա տան մոտ։}

^{«Թույլ մի՛ տվեք Սիլային խախտել հին ու բարի ավստրալական ավանդույթը, միացե՛ք մեր խորովածի արարողությանը եւ օգնեք Սիլա Կարդենին ստանալ խոզի խորովածի մի կտոր»,- ասվում է միջոցառման նկարագրության մեջ։}

^{Խորովածի միջոցառումը նախատեսված է անցկացնել հոկտեմբերի 19-ին, եւ վեգանների ներկայությունը ողջունելի չէ, ասվում է սոցցանցի էջում։}

^{Կարդենի եւ նրա հարեւանների իրավաբանական պայքարը սկսվել է անցյալ տարի։ Նրա բողոքը այս տարվա սկզբին մերժվել էր դատարանում, եւ նա վերաքննիչ բողոք էր ներկայացրել։ Այն եւս հուլիսին մերժվել էր, սակայն նա երդվել է շարունակել պայքարը։}