Սյունիքի մարզի Լեհվազ-Վարդանիձոր ավտոճանապարհին գտնվող անտառում այրվել է մոտ 12 հա բուսածածկ տարածք, գիհի և եղևնուտ: Այս մասին NEWS.am–ին հայտնում են Արտակարգ իրավիճակների նախարարությունից։
Ըստ նախնական տվյալների՝ եղևնու և գիհու անտառը գտնվում է խիստ կտրտված և անմատչելի տեղանքում: Լեհվազ և Վարդանիձոր բնակավայրների վարչական ղեկավար Ռաֆիկ Մկրտչյանը NEWS.am–ին հայտնեց, որ հրդեհի օջախները մարելու համար փրկարները ստիպված են եղել տեղանք հասնել ոտքով, քանի որ տեխնիկական միջոցները չեն կարող բարձրանալ այնտեղ։
Դեպքի վայր է մեկնել ԱԻՆ ՓԾ Ճգնաժամային կառավարման ազգային կենտրոնի արտակարգ իրավիճակների արձագանքման և մարզային փրկարարական վարչության օպերատիվ խմբերը, օպերատիվ կառավարման վարչության կապի մեքենան և հրշեջ-փրկարարական ջոկատից երկու մարտական հաշվարկ, հատուկ նշանակության փրկարարական աշխատանքների իրականացման կենտրոնի փրկարարական ջոկատից երկու մարտական հաշվարկ:
Հրդեհաշիջման աշխատանքներին մասնակցում է 67 փրկարար, ՊՆ Մեղրու N զորամասից 30 զինվոր, Մեղրու ոստիկանության 45, «Հայանտառ» ՊՈԱԿ Սյունիքի մասնաճյուղի 25, «Զանգեզուր կենսոլորտային համալիր» ՊՈԱԿ-ի 15 և «Արևիկ ազգային պարկ»-ի 15 աշխատակից:
Հիշեցնենք, րո հրդեհը բռնկվել է օգոստոսի 11–ին։ Ըստ ԱԻՆ–ի՝ հրդեհը մեկուսացվել է այսօր՝ օգոստոսի 12–ին ժամը 09:46-ին:
Կտրվի լրացուցիչ տեղեկություն:
0Comments