Թվերի փոքրիկ մանիպուլյացիա Վալերի Օսիպյանի ու Դավիթ Անանյանի կողմից

Երկու պետական մարմինների ղեկավարներն իրենց հայտարարություններում ներկայացնում են վիճակագրական հակասական տվյալներ
անանյան

Ոստիկանության պետ Վալերի Օսիպյանը և Պետական եկամուտների կոմիտեի նախագահ Դավիթ Անանյանը վերջին մեկ ամսվա ընթացքում վիճակագրական տվյալներ ներկայացրեցին իրենց ոլորտների վերաբերյալ, որոնք, սակայն, որոշ դեպքերում չեն համապատասխանում իրականությանը, գրում է fip.am-ը:

Օսիպյանի և ոստիկանության տվյալների հակասությունը

Այսպես, կառավարության հուլիսի 11-ի նիստում Վալերի Օսիպյանը, ներկայացնելով ճանապարհատրանսպորտային պատահարների վիճակագրությունը, նշեց տվյալներ, որոնք տարբերվում են հենց ճանապարհային ոստիկանության կողմից Փաստերի ստուգման հարթակին տրամադրված տվյալներից։

Ըստ ոստիկանության պետի, 2018 թ․ ապրիլի 10-ի դրությամբ Հայաստանում գրանցվել է 1861 ՃՏՊ, որի հետևանքով զոհվել է 50 մարդ և վիրավորվել 2736-ը։

Ըստ ՃՈ-ի, 2018 թ․ առաջին եռամսյակում արձանագրվել է 768 ՃՏՊ, 75 զոհ և 1124 վիրավոր։ Հաշվի առնելով, որ Վալերի Օսիպյանի կողմից հնչեցված թվերը ներառում են առաջին եռամսյակն ու ապրիլ ամսի առաջին 10 օրը, մենք որոշեցինք եռամսյակին գումարել ևս մեկ ամիս։ Արդյունքում ստացվեց, որ 2018 թվականի առաջին 4 ամիսներին արձանագրվել է 1051 ՃՏՊ, 100 զոհ և 1534 վիրավոր։

Խոսելով 2019 թվականի մասին՝ Վալերի Օսիպյանը հայտարարեց, որ ապրիլի 10-ի դրությամբ հանրապետությունում արձանագրվել է 2203 ՃՏՊ, որի հետևանքով զոհվել է 69 մարդ և վիրավորվել 3212-ը։

Սակայն ըստ ՃՈ-ի, այս տարվա առաջին եռամսյակում տեղի է ունեցել 936 ՃՏՊ, եթե գումարենք ամբողջ ապրիլի ցուցանիշները ևս՝ 320, ապա ստացվում է 1256 ՃՏՊ։

Զոհերի թիվը 2019-ի առաջին եռամսյակում 63 է, եթե ավելացնենք ապրիլի տվյալները՝ 22, ապա՝ 85։ Վիրավորների թիվը առաջին երեք ամիսներին եղել է 1399 և ապրիլի հետ միասին կազմում է 1852։

 

Այսինքն, նույնիսկ ապրիլի ցուցանիշները ներառելով՝ չենք ստանում այն թվերը, որոնք կառավարության նիստում հայտարարել էր ոստիկանության պետը։ Թերևս, բացառություն կարող է կազմել զոհերի վիճակագրությունը, որը համընկնում է Օսիպյանի հայտարարած զոհերի թվի հետ։

Դավիթ Անանյանի և ՊԵԿ-ի տվյալների հակասությունը

Կառավարության օգոստոսի 1-ի նիստում ՊԵԿ նախագահ Դավիթ Անանյանը, խոսելով ավտոմեքենաների ներմուծման մասին, հայտարարեց, որ այս տարվա ընթացքում աննախադեպ ծավալների է հասել ավտոմեքենաների ներմուծումը։

«Հուլիսի 31-ի դրությամբ ներկրվել է 68 հազար ավտոմեքենա, նախորդ ամբողջ տարին՝ 67 հազար ավտոմեքենա»,- նշեց ՊԵԿ նախագահը։

Սակայն ըստ նույն ՊԵԿ-ի տրամադրած տեղեկատվության, 2018 թվականին Հայասատան է ներկրվել 62 819 ավտոմեքենա։

Հետաքրքիր է, որ «Ժամանակ» օրաթերթն օգոստոսի 2-ի համարում Անանյանի այս հայտարարությունը փոքր-ինչ խեղաթյուրել է՝ ներկայացնելով այն իբրև առաջին կիսամյակի տվյալ, այնինչ ՊԵԿ նախագահը հստակ շեշտել էր․ «Երեկվա՝ հուլիսի 31-ի դրությամբ հունվարի 1-ից սկսած ներկրվել է շուրջ 68 հազար ավտոմեքենա»։

Իսկ առաջին կիսամյակը ներառում է հունվարից հունիս ընկած ժամանակահատվածը։

 

Փաստացի, երկու պետական մարմինների ղեկավարներն իրենց հայտարարություններում ներկայացնում են վիճակագրական տվյալներ, որոնք հակասում են իրենց իսկ ղեկավարած կառույցների կողմից մեզ տրամադրած տվյալներին։ Fip.am