7 խանգարում, որոնք կապված են վահանաձև գեղձի աշխատանքի հետ

Նկատվում են բազմաթիվ խանգարումներ, որոնք էականորեն ազդում են հիվանդի կյանքի որակի վրա
Live24.am-ը ներկայացնում է

1

Վահանաձև գեղձի հիվանդությունների հետևանքով օրգանիզմում նկատվում են բազմաթիվ խանգարումներ, որոնք էականորեն ազդում են հիվանդի կյանքի որակի վրա: Steptohealth.ru-ի հաղորդմամբ՝ վահանաձև գեղձի հիվանդությունները ժամանակակից հասարակությունում ամենատարածվածներից են: Դրանք առավել հաճախ հանդիպում են կանանց շրջանում:

Վահանաձև գեղձն օրգանիզմում բազմաթիվ գործառույթներ է կատարում, իսկ գեղձի հիվանդությունների զարգացման դեպքում դրանք խանգարվում են: Սա նշանակում է, որ կարևոր է ժամանակին ախտորոշել հիվանդությունն ու բուժում ստանալ: Որպես կանոն՝ վահանաձև գեողձի հիվանդությունները երկար են բուժվում, երբեմն պահանջվում է նաև վիրահատական միջամտություն:

Հատկանշական է, որ հիվանդությունը կարող է բավական երկար ժամանակ հստակ ախտանշաններ չունենալ, իսկ եղած ախտանշաններն էլ կարող են ընկալվել՝ որպես այլ խնդրի հետևանք: Գեղձի հորմոնների՝ նորմայից քիչ կամ շատ արտադրվելու դեպքում կարող են նկատվել մի շարք խանգարումներ:

Փորկապություն, նյութափոխանակության հետ կապված խնդիրներ: Վահանաձև գեղձի հիվանդությունները հաճախ փոփոխություններ են առաջացնում նյութափոխանակության համակարգում: Կախված ախտանշաններից՝ հնարավոր է հասկանալ՝ ինչ խնդիր ունի վահանաձև գեղձը:

Հիպոթիրեոզ

  • փորկապություն
  • սննդարար նյութերի վատ յուրացում:

Հիպերթիրեոզ

  • դիարեա
  • ցավ որովայնում
  • որովայնի փքվածություն
  • փսխում:

Դաշտանային ցիկլի խանգարում, հնարավոր անպտղություն: Վահանաձև գեղձի հիվանդությունների հետևանքով խանգարվում է նաև դաշտանային ցիկլը:

  • Հիպոթիրեոզի դեպքում դաշտանային ցիկլը սովորաբար երկար է տևում, այն բավական ցավոտ է լինում:
  • Հիպերթիրեոզով տառապող կանանց շրջանում սովորաբար դաշտանային ցիկլը կարճ է տևում, երբեմն հանգեցնում նաև վաղ դաշտանադադարի:

Այս խնդիրները սովարաբար նկատվում են այն կանանց շրջանում, ում մոտ հիվանդությունը վաղ չի ախտորոշվել կամ բուժումն անարդյունավետ է եղել:

Հոդացավեր, ցավ մկաններում: Եվս մեկ տարածված խնդիր, որը կապված է վահանաձև գեղձի հիվանդությունների հետ:

Անկախ տարիքից ու սեռից՝ հիպերթիրեոզի դեպքում հիվանդները գանգատվում են մկաններում և հոդերում զգացվող ցավից: Սա իսկապես լուրջ անհարմարություններ է ստեղծում, բայց բուժումը սկսելուց կարճ ժամանակ անց սովորաբար անցնում է:

Վահանաձև գեղձի հիվանդություններով տառապող անձինք հաճախ տառապում են նաև դաստակային թունելի համախտանիշով: Հիպերթիրեոզի դեպքում հիվանդները հաճախ գանգատվում են ցավից ու թուլությունից վերջույթներում:

Խոլեստերինի բարձր մակարդակ: Այո՛, վահանաձև գեղձի հիվանդությունները կարող են ազդել արյան մեջ խոլեստերինի մակարդակի վրա: Եթե ոչ մի կերպ չի հաջողվում կարգավորել խոլեստերինի մակարդակը, հարկավոր է ստուգել վահանաձև գեղձը: Հիպոթիրեոզի դեպքում կարող է նկատվել՝ խոլեստերինի բարձր, հիպերթիրեոզի դեպքում՝ ցածր մակարդակ:

Քնի հետ կապված խնդիրներ: Խնդիր, որը բավական հաճախ է ուղեկցում վահանաձև գեղձի խանգարումներին և զգալիորեն ազդում հիվանդների կյանքի որակի վրա: Խոսքը միայն քնի որակի մասին չէ: Վահանաձև գեղձի հիվանդությունների դեպքում նույնիսկ մի քանի ժամ շարունակ քնելուց հետո մարդը հոգնածություն է զգում, ուժերը չեն բավականացնում:

Այլ դեպքերում հիվանդին տանջում է անքնությունը. հաճախասրտությունը, անհանգստության բարձր մակարդակն ու նյարդային վիճակը թույլ չեն տալիս հանգստանալ:

Մաշկային փոփոխություններ: Վահանաձև գեղձի հիվանդությունների դեպքում մազաթափությունը հաճախ ուղեկցվում է նաև մաշկային խնդիրներով:

Հիպոթիրեոզի դեպքում մաշկը կոշտանում է, չորանում, թեփոտվում: Կրունկներին, ծնկներին, արմուկներին ճաքեր են հայտնվում: Հիպերթիրեոզի դեպքում մաշկը գերզգայուն է դառնում ջերմաստիճանի փոփոխության նկատմամբ:

Դեպրեսիա, անհանգստություն: Հիպոթիրեոզը, որը կապված է վահանաձև գեղձի ակտիվության նվազման հետ, կարող է ազդել սերոտոնինի և դոպամինի մակարդակի վրա, ինչի հետևանք է դառնում դեպրեսիվ վիճակը: