Դա ապատեղեկատվություն է, աղբատար 5 «ԿամԱԶ»-ներն էլ գտնվում են սարքին վիճակում, ավելին՝ այս պահին աշխատանքի մեջ են: Ցանկացած հետաքրքրվող լրագրող կարող է գալ և հետևել դրանց աշխատանքին: Tert.am-ի հետ զրույցում այս մասին ասաց Երևանի քաղաքապետի մամուլի խոսնակ Հակոբ Կարապետյանը՝ անդրադառնալով մամուլի այն հրապարակմանը, թե քաղաքապետարանի ձեռք բերած «ԿամԱԶ»-ները մեկը մյուսի հետևից խափանվում են:
«Մեկն անցած շաբաթ հայտնվել է ՃՏՊ-ի մեջ, սակայն արագ վերականգնվել է և երկուշաբթի օրվանից աշխատում է»,-նշեց Կարապետյանը:
Վերջինս նաև անդրադարձավ այսօր Երևանի Դավիթաշեն համայնքում տեղի ունեցած դեպքին, երբ աղբատար «ԿամԱԶ»-ներից մեկը խրվել է ասՖալտի մեջ:
«Այդ հատվածում եղել է բաց դիտահոր, հանրային ծառայություն մատուցող ընկերություններից մեկի բաց դիտահորն է եղել, որի մեջ էլ ընկել է մեքենան»,-պարզաբանեց Կարապետյանը:
Մամուլի խոսնակը նաև նշեց, որ գնվել է ևս 19 աղբատար մեքենա, որոնք ճանապարհին են:
0Comments