Առավոտյան ծաղկեփնջով եկավ դպրոց. Հացավանի դպրոցն այս տարի ունի մեկ շրջանավարտ

^{Կոտայքի մարզի Հացավանի Հայկ Մանուկյանի անվան միջնակարգ դպրոցն այս տարի մեկ շրջանավարտ  ունի՝ Գագիկ Թադեւոսյանը: NEWS.am-ի հետ զրույցում  դպրոցի տնօրեն Սուսաննա Սահակյանը նշեց, որ դպրոցն ընդամենը 36 աշակերտ  ունի. Գագիկը սովորում էր եռահամակազմ դասարանում՝ 11-րդ եւ 10-րդ դասարանների եւս չորս աշակերտների հետ:}

^{«Վերջին դասի, վերջին զանգի արարողությունն այս տարի մեր դպրոցում յուրօրինակ էր, անսովոր, բայց նույնքան հուզիչ, որքան մյուս բոլոր տարիներին: Պատճառն այն էր, որ շրջանավարտը մեկն էր՝ Գագիկ Թադեւոսյանը: Այսօր Գագիկին ճանապարհում ենք նոր հասուն կյանք: Միջին ընդունակությունների տեր տղա է Գագիկը: Կավարտի ու մի քանի ամսից կգնա բանակ: Վերջին ամիսներին երկընտրանքի առաջ էր կանգնել՝ գնալ բանակ «Ես եմ» ծրագրով, թե՞ ոչ: Ի վերջո, ընտրեց երկամյա պարտադիր ժամկետային զինծառայությունը: Քանի որ Գագիկը սովորում էր նույն դասարանում 3 տասներորդցիների եւ 1 տասնմեկերորդցու հետ, ուստի այսօր նրանք ուրախ տրամադրությամբ, երգ ու պարով ճանապարհ դրեցին իրենց ընկերոջը»,-պատմեց Սուսաննա Սահակյանը:}

^{Տնօրենը նշեց, որ Գագիկն առավոտյան ծաղկեփնջով եւ տորթով եկել է դպրոց, դասարանում հավաքվել են, ընկերներն արտասանել են, երաժշտություն միացրել, ուրախացել: Դասղեկն ու ընկերները բարեմաղթանքի խոսքեր են ասել, կատակել, զրուցել.}

^{«Ժապավենով զանգ ենք պատրաստել, ամրացրել նրա վերնաշապիկին, փորձել ենք անել հնարավորը, որպեսզի Գագիկի օրը հիշարժան դարձնենք՝ աշակերտների ոչ մեծ թվով, բայց բարձր տրամադրությամբ»,-ասաց Սուսաննա Սահակյանը:}

^{Տիկին Սահակյանը նշեց, որ գյուղը մայրաքաղաքին շատ մոտ է, բայց դպրոցի աշակերտների սակավաթիվ լինելը պայմանավորված է հիմնականում ցածր ծնելիությամբ, սոցիալական պայմաններով:}

^{Գյուղացիների զբաղմունքն, ինչպես բոլոր գյուղերում, գյուղատնտեսությունն ու հողագործությունն է:}

^{Մայրաքաղաքին մոտ լինելով՝ շատերն աշխատանք են գտնում նաեւ մայրաքաղաքում:}