Հերպեսի վիրուսները փոխանակվում են ԴՆԹ-ով եւ կարող են ձեւավորել ավելի մահաբեր շտամներ

Բերանի եւ գենիտալ հերպեսները կարող  են «խաչվել», մուտացվել՝ ձեւավորելով նոր, էլ ավելի վտանգավոր տեսակներ, նախազգուշացնում են Washington University-ի գիտնականները։

Գենիտալ եւ բերանի հերպեսները, ըստ գիտնականների, որպես շտամներ բաժանվել են մոտ 6 միլիոն տարի առաջ։ Եվ հիմա դրանք նորից մերձենալու ձեւ են գտել։ Եթե այս տեսակները կարողանան միավորվել, դրանց դեմ ստանդարտ թերապիան չի աշխատի։

1-ին տեսակի հերպես (բերանի) ունենում է Երկրի 50-ից ցածր տարիքի բնակչության մոտ երկու երրորդը։ Բժիշկները նշում են, որ վերջին տարիներին այդ շտամը ավելի հաճախ է սկսել արտահայտվել ոչ միայն շուրթերի վրա, այլ նաեւ գենիտալիաների շրջանում։ Այդ վիրուսը կարող է փոխանցվել համբույրի, ինչպես նաեւ ատամի խոզանակների միջոցով։

Գենիտալ հերպեսը (2-րդ տեսակ) հանդիպում է միայն բնակչության 16 տոկոսի մոտ եւ վարակում է բացառապես գենիտալ գոտին։ Այն, որպես կանոն, փոխանցվում է սեռական ճանապարհով։ Վիրուսի դեմ դեղամիջոցներ չկան. եթե մարդը վարակվել է, վիրուսը մնում է նրա օրգանիզմում ամբողջ կյանքում։ Հակավիրուսային դեղամիջոցները կարող են միայն զսպել վիրուսը՝ նվազեցնելով սրացումների եւ ուրիշներին փոխանցելու հավանականությունը։

Գիտնականները վիրուսի նմուշի հետազոտություններ են կատարել, որոնք վերցրել են 1994-2016 թվականներին հերպեսով վարակված մարդկանցից։ Փորձագետներին հետաքրքրում էր վիրուսների ԴՆԹ-ն։ Արդյունքում՝ 2-րդ տեսակի հերպեսում հայտնաբերվել են 1-ին տեսակի հերպեսի   նշաններ։ Մի պացիենտի մոտ նկատվել են վիրուսի երկու տեսակով վարակման նշաններ, եւ դրանք հաջողությամբ խառնվել են մեկը մյուսին։