Հարկային օրենսգրքում առաջարկված փոփոխությունները բխում են բանկերի և հարուստների շահերից

Տնտեսական շատ սուբյեկտներ ստիպված կլինեն դադարեցնել իրենց գործունեությունը
Սուրեն Պարսյան

Հարկային օրենսգրքում իշխանությունների առաջարկած փոփոխություններից հարուստներն ավելի լավ կապրեն, որպեսզի երկիրը կարողանա զարգանալ։ Այս մասին այսօր լրագրողների հետ հանդիպմանն ասել է ՀՅԴ Գրասենյակի տնտեսական հետազոտությունների բաժնի պատասխանատու, տնտեսագետ Սուրեն Պարսյանը։

Տնտեսագետի խոսքով՝ այս տրամաբանությամբ Հայաստանի նոր կառավարությունը նախատեսում է հավասարեցնել եկամտահարկը եւ դրանով իսկ 22 մլրդ դրամով նվազեցնել ունեւոր քաղաքացիների վճարելիք հարկերը։

«Այդ միջոցները նախատեսվում է փոխհատուցել եւ լրացնել ի հաշիվ փոքր ու միջին բիզնեսի եւ մեր ողջ հասարակության»,- պարզաբանել է փորձագետը՝ հավելելով, որ հենց սրանում է թաքնված անարդարությունը։

Պարսյանը նաեւ նշել է, որ համաձայն Հարկային օրենսգրքի բարեփոխման նախագծի՝ գրավատների համար նախատեսված պետական տուրքը կբարձրանա՝ 100 հազար դրամից հասնելով 6 միլիոն դրամի, իսկ փոխանակման կետերի համար՝ 50 հազար դրամից մինչեւ 30 միլիոն դրամի։ Այսինքն՝ պետական տուրքը կբարձրանա 60 անգամ, եւ սա ոչնչով հիմնավորված չէ»,- ընդգծել է տնտեսագետը։

Ընդ որում՝ նա ավելացրել է, որ նման բարեփոխումների հետեւանքով տեղի կունենա այս ոլորտի մոնոպոլացում, ինչը բխում է միջին եւ խոշոր բանկերի շահերից, որոնք Հայաստանում 17-ն են։ Արդյունքում՝ տնտեսական շատ սուբյեկտներ ստիպված կլինեն դադարեցնել իրենց գործունեությունը։