Անհասկանալի է ՀՀ արտաքին գործերի նախարար Արարատ Միրզոյանի հայտարարությունը, թե Լեռնային Ղարաբաղի ո՛չ ժողովուրդը, ո՛չ իշխանություններն իրենց չեն լիազորել բանակցել Արցախի կարգավիճակի շուրջ:
Այս մասին Tert.am-ի հետ զրույցում ասաց Արցախի նախագահի հատուկ հանձնարարություններով ներկայացուցիչ, խորհրդական Դավիթ Բաբայանը:
Արցախի նախագահի խորհրդականը հարց է բարձրաձայնում՝ ի՞նչ է նշանակում մանդատ ստացե՞լ են, թե՞ ոչ։
Բաբայանի կարծիքով՝ Հայաստանի իշխանությունները մանդատ ստացել են հայ ժողովրդից՝ Արցախը պաշտպանելու և պահպանելու։
«Արցախի մասին դրույթներ կան գրված ՀՀ Սահմանադրության մեջ, որոնք պարտավոր են կատարվել: Արցախի վերաբերյալ դրույթներ կան գրված նաև ՔՊ կուսակցության կանոնադրության, ծրագրի մեջ, հետևաբար, նրանք իրենց վրա են վերցրել այդ պարտավորությունը։
Իրենք դրանով իսկ պարտավորություն են վերցրել, որ պահեն Արցախը: Հիմա ի՞նչ է նշանակում՝ մենք մանդատ չենք ստացել, իսկ Ձեզ մանդատ տվե՞լ են, որ Արցախը ճանաչեք Ադրբեջանի կազմում»,- տարակուսեց Արցախի նախագահի հատուկ հանձնարարությունների գծով ներկայացուցիչը:
Դավիթ Բաբայանը նաև նշեց, որ Հայաստանը հանդիսանում է Արցախյան հակամարտության և՛ կողմ, և՛ բանակցային գործընթացի կողմ, ինչն ամրագրված է Բուդապեշտի գագաթնաժողովի որոշման մեջ: Արցախի նախագահի խորհրդականի խոսքով՝ այս ամենը նաև միջազգային պարտավորություն է, որը պետք է կատարվի:
«Այդ մանդատն իրենք են վերցրել մի մասը պարտավորությունների տեսքով: Հիմա էլ ի՞նչ մանդատ են ուզում: Եթե Հայաստանը հրաժարվում է Արցախից, այսինքն՝ մայրը հրաժարվում է իր երեխայից, սա որևէ ձևով լավ բանի չի բերելու: Պետք է հասկանել, թե ինչ ծանր խաչմերուկում ենք մենք հիմա գտնվում: Սա ոչ միայն Արցախի, այլ՝ հայ ժողովրդի ինքնորոշման հարցն է»,-նշեց նա:
Հիշեցնենք՝ ԱԺ-ում բյուջետային քննարկումների ժամաակ Արարատ Միրզոյանը հայտարարել է, որ Լեռնային Ղարաբաղի ժողովրդի կողմից մանդատ չեն ստացել՝ իրենց ապագան բանակցելու:
0Comments