Tert.am-ը հարցմամբ դիմել է «Գազպրոմ Արմենիա» ՓԲԸ-ին՝ պարզելու, թե ինչպե՞ս է կազմակերպվում Արցախի Հանրապետության գազամատակարարումը և, մասնավորապես, ինչպե՞ս է տեխնիկապես հնարավոր պարբերաբար դադարեցնել և վերականգնել գազամատակարարումը։
«Գազպրոմ Արմենիա» ընկերության մամուլի ծառայությունից Tert.am-ին տեղեկացրեցին, որ ընկերությունը բնական գազ է առաքում «Արցախգազ» ՓԲԸ-ին՝ ՀՀ տարածքում գտնվող առաքման կետում։
«Մասնավորապես՝ բնական գազի առաքումն իրականացվում է Սյունիքի մարզի Տեղ բնակավայրի մոտակայքում գտնվող Տեղ չափիչ հանգույցի միջոցով։ Նշված չափիչ հանգույցում ավարտվում են «Գազպրոմ Արմենիա» ՓԲԸ-ի տեխնիկական գործառույթները և Արցախի Հանրապետության տարածքում գազամատակարարման ցանցի վերաբերյալ մնացած հարցերը «Գազպրոմ Արմենիա» ՓԲԸ-ի իրավասության շրջանակից դուրս են», - նշեցին ընկերության մամուլի ծառայությունից։
Ինչպես հայտնի է, Արցախը սնուցող գազատարի մի հատված պատերազմի հետևանքով անցել էր ադրբեջանական վերահսկողության ներքո։ Հայտնի է նաև, որ հետագայում գազատարի այդ հատվածում ադրբեջանցիները տեղադրել են համապատասխան փական, ինչը նրանց թույլ է տալիս ցանկացած պահի դադարեցնել և վերականգնել Արցախի գազամատակարարումը, որի ականատեսն ենք այս օրերին։
Ընկերությունից նաև հայտնեցին, որ գազամատակարարման հետ կապված խնդիրների դեպքում՝ անվտանգության և տեխնիկական նկատառումներից ելնելով, «Արցախգազ» ՓԲԸ-ն օպերատիվ դիմում է «Գազպրոմ Արմենիա» ՓԲԸ-ին բնական գազի փոխադրումը Տեղ չափիչ հանգույցից ժամանակավորապես դադարեցնելու համար, ինչին «Գազպրոմ Արմենիա»-ն համապատասխան արձագանքում է։
0Comments