Եթե ռուսական ռազմակայաններին հասցված հարվածները հասցվել են ուկրաինական անօդաչու թռչող սարքերի միջոցով, ապա դա վկայում է այն մասին, որ Ուկրաինան ի վիճակի է հեռու տարածությունից հարձակվել հակառակորդի վրա, իսկ ռուսական հակաօդային պաշտպանության համակարգերը շատ ավելի թույլ են, քան նախկինում ենթադրվում էր։
Նման կարծիք են հայտնել արեւմտյան ռազմական փորձագետները, հաղորդում է «Ամերիկայի ձայնը»։ Մասնավորապես, մեկնաբանելով ռուսական հաղորդագրություններն այն մասին, որ ուկրաինական ուժերը հարվածներ են հասցրել Սարատովի մարզում գտնվող Էնգելս ավիաբազային և Ռյազանի մոտ գտնվող Դյագիլևո օդանավակայանին, ամերիկացի գեներալ և Եվրոպայում ԱՄՆ ուժերի նախկին հրամանատար Բեն Հոջեսն ասել է, որ Ուկրաինան. հաշվի առնելով իր գիտական և տեխնիկական ներուժը, կարող է ստեղծել անօդաչու սարքեր, որոնք ունակ են նման հարձակման:
Ըստ Հոջեսի՝ այն փաստը, որ նման զենքեր են հայտնվել ուկրաինական բանակի զինանոցում, հուշում է, որ ուկրաինացիները, նույնիսկ առանց արևմտյան միջին հեռահարության զենքի, ունակ են գրոհել օկուպացված Ղրիմում գտնվող բազաները և մոտ ապագայում կարող են ազատագրել Ղրիմը։
«Եթե հիմա նրանք կարողանում են հարվածել Ղրիմի շուրջ տարբեր հենակետերի, օրինակ՝ Սևաստոպոլի ավիաբազային և ռազմածովային բազային, նշանակում է, իմ կարծիքով, որ ռուսական ուժերն ի վիճակի չեն պահել Ղրիմը։ Ի վերջո, ակնհայտ է, որ ուկրաինացիները մտադիր են ազատագրել Ղրիմը մինչև ամառվա վերջ»,- իր կարծիքն է հայտնել ամերիկացի գեներալը։
Մեկ այլ ռազմական փորձագետ՝ ԱՄՆ բանակի պաշտոնաթող մայոր Մայք Լայոնսը նույնպես ասել է, որ ռուսական բազաների վրա հարձակումը ցույց է տալիս, որ Ուկրաինան ազդանշան է ուղարկում, որ ունի նման հարձակումների հնարավորություն։ Նրա խոսքով՝ հարձակումները շատ ճշգրիտ են եղել, թեեւ «700 կմ հեռավորության վրա թիրախ խոցելը շատ դժվար է»։
Ըստ Լայոնսի՝ ռուսական հակաօդային պաշտպանության ուժերը զգալիորեն ավելի թույլ են, քան նախկինում կարծում էին ԱՄՆ զինված ուժերը Սառը պատերազմի ժամանակ։
«Ռուսական հակաօդային պաշտպանությունն անցնելը պարզապես չլսված էր «սառը պատերազմի» ժամանակ: Մեզ համար, ՆԱՏՕ-ի համար դա ուղղակի անհնար էր: Եվ նաև հոգեբանորեն այն փաստը, որ Ուկրաինան կարող է վերցնել 1970-ականների այդ անօդաչու սարքերը, տեխնոլոգիաները, ազատվել տեսախցիկներից, այլ բաներից, և ավելացնել այլ հնարավորություններ, սա շատ մեծ առավելություն է տալիս»,- նշել է փորձագետը։ Նրա խոսքով, դա նշանակում է, որ ռուս զինվորականներն այժմ պետք է պաշտպանեն իրենց ռազմական օբյեկտները, մասնավորապես՝ օդանավերը Ռուսաստանի Դաշնության տարածքում։
Մեկ այլ ռազմական փորձագետ, Ավստրալիայի բանակի պաշտոնաթող գեներալ և Վաշինգտոնի ռազմավարական և միջազգային հետազոտությունների կենտրոնի աշխատակից Միք Ռայանն ասել է, որ «այդ հարվածի արդյունքում Ռուսաստանը կարող է ստիպված լինել վերանայել իր պաշտպանական դիրքը», այսինքն՝ ռազմավարական ռմբակոծիչների օդանավակայանները հեռացնել Ուկրաինայի սահմաններից։
Նրա կարծիքով, դա կարող է նշանակել, որ Ուկրաինան հետագայում էլ պահպանելու է նախաձեռնությունն այս պատերազմում, «և նրանք մտադիր են պահպանել այն բոլոր մակարդակներում, որտեղ ընթանում է այս պատերազմը»։
0Comments